الأمراض التي ممكن تصيب كبار السن
بوست النهارده عن أمراض المخ و الأعصاب في كبار السن من آباءنا و أمهاتنا و أجدادنا بارك الله لهم و أطال في أعمارهم
طبيعي مع تقدم العمر تحدث بعض التغيرات .. المشيه تتقل شويه .. الذاكره تضعف شويه.. الحاله النفسيه و المزاجيه تتغير شويه
بس اهم حاجه موضوع" شويه" ده لأن لو بقي شويتين أو اكتر ممكن يشير لوجود أمراض مخ و أعصاب تتخطي مجرد الشيخوخة مثل :
١- ضعف متزايد بالذاكره و الإدراك و لخبطه في الأماكن و الأوقات و الأشخاص و تكرار لنفس السؤال رغم الاجابه عليه .. ممكن يبقي ألزهايمر
٢- رعشه واضحه مع بطء الحركه و صعوبات في المشي .. ممكن يبقي باركنسون (الرعاش)
٣- رعشه واضحه لما يمسك كوبايه أو قلم أو معلقه و معهاش بطء الحركه.. ممكن تبقي الرعشه الاساسيه essential tremors
٤- صعوبات في التحكم في الإخراج ممكن تبقي المثانه العصبيه neurogenic bladder
٥- اضطرابات النوم مشهوره جدا في كبار السن .. أرق .. قله ساعات النوم .. نوم مقطع .. صحيان بدري بدون داعي
٦- لو حصل تقل مفاجيء في اللسان أو اليد أو تنميل ناحيه من الجسم ممكن تبقي جلطه أو نزيف بالمخ .. و حتي لو الاعراض اختفت بعد دقايق ممكن تبقي مقدمات جلطه transient ischemic attacks
٧- كبار السن اكتر عرضه للأمراض النفسيه مثل الاكتئاب و التوتر و القلق ..و حتي ممكن تغيرات السمات الشخصيه فيصبح أكثر حده و أقل صبرا و أكثر شكا ..و الدعم النفسي ليهم طول الوقت مهم جدا
٨- لو الوقوع علي الارض متكرر لازم نهتم جدا نروح لدكتور مخ و أعصاب نعرف السبب .. الوقوع مضاعفاته كتير .. اشهرها لاقدر الله كسور مفصل الفخذ و نزيف المخ subdural haemorrhage و اللي ممكن تبان اعراضه بعد كذا يوم من الوقوع
٩- هناك أمراض مخ و أعصاب مشهوره في الاطفال و المراهقين قد يزيد معدل حدوثها مجددا مع تقدم العمر .. مثل نوبات التشنجات و اضطراب كهربية المخ epilepsy و مثل مرض الوهن العضلي myathenia gravisl و مثل المرض الكوري senility chorea
١٠ - بعض أنواع الألم عاده ما تظهر في كبار السن زي الآم العصب الخامس في الوجه Trigeminal neuralgia و الآم ما بعد الحزام الناري postherpetic neuralgia
شويه نصايح سريعه الاعتناء بآبائنا و أمهاتنا و اجدادنا
١-لازم تنسيق الأدوية..ممكن نكون متابعين مع كذا دكتور لكذا تخصص و الأدوية بينها تعارض أو مكررات مكتوبه بأسماء تجاريه مختلفه
٢- شرب السوائل بكتره و تقليل الوزن
٣- الخروج و لو مره شهريا
٤- الجلسات العائلية اللطيفة و لو مره أسبوعيا
٥- الدعم النفسي مهم جدا ..القرآن لم يوصي الام بولدها .. عارف انها مش محتاجه وصايه
لكن وصانا بالوالدين .. و لما وصي .. وصي اكتر بالدعم النفسي لأنه عارف انه ده هيجي وراه كل أنواع الدعم الاخري ..
لا تقل لهما أو ف .. مفيش ضجر و لا تضجر .. لا تنهرهما .. مفيش زعيق و لا خناق .. قل لهما قولا كريما .. قول كلام حلو .. بلاش كلام في المشاكل .. و اخفض لهما جناح الذل من الرحمه .. متتكسفش و لا تتكبر عن خدمتهم و رعايتهم حتي و لو في قضاء الحاجه
و خليك فاكر
كما تدين تدان
